اغاني تبعث التفاؤل

<iframe width="560" height="315" src="https://www.youtube.com/embed/KSuB4t3q_dA" frameborder=



https://www.youtube.com/watch?v=jZhQOvvV45w

ما قالو لية !!!!

دايما بفكر هل الزواج و الحب نفس شي ؟ ولا الزواج شي و الحب شي تاني . في ثقافتنا دايما بنسمع و نحن صغار الكلام بتاع يوم سعدك و يوم يعرسوك و ان شاء الله السنة الجاية في بيتك و وووووووو اخرو و كلو كلام بوحي انو السعادة بتاعت الحياة كلها ورا البيت اللي حكون مع الانسان اللي عندو مصبا ح علاء الدين و يحقق لي كل احلامي و امنياتي و احتياجتي و فوق ده كلو حيسعدني زي ما بقولو الامريكان Will make me Happy .

اقعد و ااجل كل شي في حياتي لغاية ما تجي اللحظة الحاسمة او لحظة الانطلاق الى بر السعادة و الورود و الرياحين و اي فليم رومانسي او قصة حب سمعتها او حكوها لي و انا حفظتها عن ظهر قلب حتتحقق في البيت ده و مع الانسان الخارق اللي عندو قدرات عجيبة ما موجودة في اي روبوت او جهاز الكتروني . مبرمج على انو يسعد و يفرح و يحقق الاحلام و يصنع المعجزات .

ودخلنا الجنة الموعودة واللحظة جات اللي كنت بستناها وانا والسوبرمان مع بعض !!!!!!!

لكن ليه ياربي ما بشتغل كويس ليه الانسان الخارق ده ما قاعد يعمل الحاجات الموجودة في الmanual .

المفروض انو يسعدني المفروض انو يفهمني المفروض انو يعمل لية اي حاجة انا عايزاها وين الامسيات الرومانسية و ين الزهور وين الهدايا وين الكلام المعسول وين الشعر وين وين وين .

ليه لازم اعمل اكل كل يوم  ما قالوا لية انو بياكل !!! ما قالو لية انو بشرب !!! ما قالو لية انو لازم اغسل ليه هدومو !!!! ما قالو لية لما يكون زهجان و جيعان ما بركز !!!! ما قالو لية ما قلو لية ما قالو لية حاجات كتيرة !!!! و بعدين  ليه لازم كل جمعة تمشي للنسابة و بعدبن النسابة ديل مافي زول جاب لي عنهم اي سيرة انا ما عارفة انو الباكيج بتجي معاها حاجة اسمها النسابة ديل جو من وين و كانو وين وليه هم كدا حاجة غريبة جدا بعدين مافي اي تعليمات عن كيفية التعامل ماهم ياربي هسي اعمل شنو . و الزمن بيمشي و بمر وانا قاعدة بحاول اعرف كيف اشغل الشي ده . يا اخوانا زول ينجدني زول يساعدني . و جو العيال وما ادراك ما العيال و المسؤلية بتاعت العيال و الشي الخارق دايما يتعذر من خدمة العيال داير ينوم داير يمشي للشباب ولا  واحد صاحبو داير مساعدة ولا  ناس الشغل حلفوا عليه يمين الطلاق ما يرجع بيتهم بدري و يقعد يقش ليهم المكتب قبل ما يمرق ومع المعمعة دي عرفت انو ده العرس او الزواج او سعدي اللي كنت راجياه.

 عرفت انو الحب و الزواج موجودين و ممكن يكون في زواج و حب و ممكن يكون في زواج و عشرة و احترام اللي مع الزمن و الرعاية بيتحول الى حب. في مجتمعاتنا في حب لكن ما بنتكلم عنو بصورة واضحة لأنو احنا جايين من ثقافة بتركز اكتر على شكل العلاقة اكثر من العلاقة نفسها . شكل العلاقة اللي المجتمع بتقبلها و بباركها ام العلاقة فهي مسؤولية الطرفين اللي بتربطهم العلاقة . هما من واجبهم انو يراعوها و يعتنوا بيها و يحافظوا عليها.

لحظات !!!

الحياة في تقديري الشخصي عبارة عن مجموعة من اللحظات. في خلال ال 24 ساعة بتمر بينا العديد من اللحظات اللي مما ممكن حصرها لكن اثرها موجود في دواخلنا و بتشكل تصرفاتنا وسلوكياتنا خلال اليوم . فبنلقى اللحظة الحزينة اللي في لمح البصر تاخدنا الى اعمق و اشد احزان مرت بينا وممكن تنزل دمعة او تطلع اهة او زفرة تاثرا باللحظة دي وفي اللحظة الحرجة اللي بتخلي نبضات القلب تتسارع والواحد يفتكرالناس كلها الحولينو سامعاها كانها مدفع ويمكن كمان تنزل كم حبة كدا بتاعت عرق دلالة على قمة الحراج. ونجي بقى للحظات المرحة اللي بتبحر بينا الى اسعد و اجمل المواقف في حياتنا ودلالة على اللحظة دي بنطلق ضحكة او بترتسم ابتسامة جميلة على الشفاه اعلانا بانها لحظة سعيدة ودي بقى اللحظة اللي بنكون عايزنها تدوم وما تنتهي كباقي اللحظات

واخيرا !!!!!

سلام واحترام

واخيرا عملت  البلوج او كما يسمونه المدونة . اترددت كتير  قبل ما اعملها لكن حسيت اني جاهزة اني  اكتب واطلع الجواي لأنو كتر ما عارفة هل  بسبب العمر ولا التجارب اللي مريت بيها ولا الاحباطات اللي واجهتني لأنو  انا بؤمن اللي بيعمل الأنسان بيعمل دي زاتا ما كلمة بتشرح لية اللي دايرة اقولو  ممكن نقول اللي بصقل الأنسان الصعوبات اللي واجهتو في حياتو و الطريقة اللي واجه بيها هذي الصعوبات و الصعوبات كتيرة و متنوعة على كل حال دي بس بداية بسيطة للي جاي واللي حيجي كمان حاحاول  بقدر الأمكان اني اكتب بصورة سهلة وبسيطة عشان الكل يقدر يقرا ويفهم و كمان يستمتع . حاكتب باللهجة الدارجية او اللهجة المحلية ليه . لأنو الدارجي ساهل مفهوم وهو سوداني الفصحى ممكن اكتب بالفصحى و لكن كلامي اللي بقولو ده لينا نحن السودانيين الدشنين ديل اللي عايزين شغل كتير انا ما حاستبعد نفسي من الكلام ده انا برضي دايرة شغل زي اي سوداني كان في السودان ولا برا السودان على العموم حبابكم عشرة ة بلا كشرة و اهلا و سهلا في المدونة بتاعتي.

umleena
05/29/2011